بجھے چراغ جلانا اسی کو آتا ہے
خزاں میں پھول کِھلانا اسی کو آتا ہے
وہ سامنے ہو تو، پھر کچھ نظر نہیں آتا
دل و نگاہ پہ چھانا اسی کو آتا ہے
متاعِ حسن کو شرم و حیا کے آنچل میں
چھپا چھپا کے دِکھانا اسی کو آتا ہے
اسی کے آنے سے شاخوں پہ پھول آتے ہیں
بہار اوڑھ کے آنا، اسی کو آتا ہے
وہ گیت ہو کہ غزل، سب اسی کی باتیں ہیں
سخن کو راہ دِکھانا اسی کو آتا ہے
کوئی بتائے کہاں تک، مہارتیں اس کی
ہر ایک کارِ زمانہ اسی کو آتا ہے
باقر زیدی
No comments:
Post a Comment