گِلا ہے بے وفائی کا نہ شکوا کج ادائی کا
عجب لذت فزا ہے درد زخمِ آشنائی کا
تِری راہِ طلب میں ناتوانی میری حائل ہے
نتیجا دیکھئے ہوتا ہے کیا بے دست و پائی کا
ہوائے موسمِ گل ہے تِرے میکش نہ سنبھلیں گے
کریں گے ٹکڑے ٹکڑے آج دامن پارسائی کا
نزاکت دیکھ کر خنجر بکف قاتل کو بول اٹھی
خدا ہی حافظ ہے اس نازک کلائی کا
اسیرانِ محبت کو اسیری عین راحت ہے
ستم ڈھاتا ہے آ جانا تصور بھی رہائی کا
سرِ بالیں تم آ کر مجھ سے آنکھیں کیوں چراتے ہو
بھلا یہ بھی کوئی موقع ہے الفت آزمائی کا
عبث اے بختِ خُفتہ قیس کو رُسوا نہ کرنا تھا
لگا کر آہ کے دامن میں دھبا نارسائی کا
قیس آروی
ضمیرالحق
بہارستانِ خلد
No comments:
Post a Comment