لمحہ خواب میسر سے بچھڑ جاتا ہوں

 لمحۂ خوابِ میسر سے بچھڑ جاتا ہوں

آنکھ کھُلتی ہے تو منظر سے بچھڑ جاتا ہوں

میری خوش بختی کہ احباب بہت ہیں میرے

بد نصیبی ہے کہ اکثر سے بچھڑ جاتا ہوں

ایک دُکھ تو مِرا دیوار سے لگ جانا ہے

دوسرا یہ ہے کہ میں در سے بچھڑ جاتا ہوں

رونا چاہوں تو میں باہر کی خبر لیتا ہوں

اور ہنسنا ہو تو اندر سے بچھڑ جاتا ہوں

شب گزرتی ہے زمانے کی نظر میں لیکن

میں تِری یاد کے دفتر سے بچھڑ جاتا ہوں

دشت میں بھاگتے گھوڑوں کے سُموں سے ساون

دُھول اڑتی ہے تو لشکر سے بچھڑ جاتا ہوں

ساون شبیر