بے وجہ یہ ہنگام بہاراں تو نہیں ہے

بے وجہ یہ ہنگامِ بہاراں تو نہیں ہے

کچھ سازشِ اربابِ گلستاں تو نہیں ہے

اے جوشِ جنوں کھول کے آنکھیں تو ذرا دیکھ

ہاتھوں میں کہیں ان کا گریباں تو نہیں ہے

ہونے کو ہے یہ نظم جہاں درہم و برہم

آنسو کوئی لرزاں سرِ مژگاں تو نہیں ہے

ہونے کو مجاہد بھی ہیں جانباز بھی لیکن

وہ حوصلۂ بو زر و سلماں تو نہیں ہے

رہ رہ کے نظر سُوئے فلک اُٹھتی ہے زمزم

وہ مجھ پہ کہیں آج مہرباں تو نہیں ہے

صوفی محمد ایوب زمزم