جو تری نظر میں پنہاں نہ یہ اعتبار ہوتا

 جو تِری نظر میں پنہاں نہ یہ اعتبار ہوتا

مِری جاں غبار ہوتی مِرا دل مزار ہوتا

کہیں ہم بھی ڈھونڈ لیتے کوئی عافیت کا عنواں

یہ جو بے قرار دل ہے، اسے گر قرار ہوتا

کوئی رمز دید ہوتا کہ بہانۂ سکوں ہو

مِری آرزو بہلتی، اگر انتظار ہوتا

یہ شبانِ ہجر کٹتیں یہ دلِ حزیں بہلتا

جو سحر کے آئینے میں کہیں رُوئے یار ہوتا

کبھی شاخِ گل لچک کر خبرِ بہار دیتی

کہیں سرمئی فضا میں کوئی نغمہ بار ہوتا

نہ جو دل کے آسماں پر کوئی برق سی لپکتی

غمِ مرگِ آرزو ہی مِرا غمگسار ہوتا

تِری بے رخی پہ کھلتا کبھی درد دل کا مضموں

نہ یہ حرفِ مختصر گر تِرے دل پہ بار ہوتا

ساجدہ زیدی