دل سے اب تو نقش یاد رفتگاں بھی مٹ گیا

 دل سے اب تو نقشِ یادِ رفتگاں بھی مِٹ گیا

اس خرابے سے بالآخر یہ نشاں بھی مٹ گیا

کس قدر خاموش تھا میداں سرِ شامِ شکست

مرحبا کے ساتھ شورِ الاماں بھی مٹ گیا

پہلے تو سایہ فگن تھا خاک ہو جانے کا خوف

پھر دلوں سے رنجِ عمرِ رائیگاں بھی مٹ گیا

ٹوٹتا جاتا ہے اب تاراج خوابوں کا طلسم

آنکھ سے عکسِ نگارِ مہرباں بھی مٹ گیا

زندگی اور موت میں اک فرق تھا ہم سے منیر

مٹ گئے ہم فرق ان کے درمیاں بھی مٹ گیا

سراج منیر