اک سبز رنگ باغ دِکھایا گیا مجھے
پھر خُشک راستوں پہ چلایا گیا مجھے
طے ہو چکے تھے آخری سانسوں کے مرحلے
جب مژدۂ حیات سنایا گیا مجھے
پہلے تو چھین لی مِری آنکھوں کی روشنی
پھر آئینے کے سامنے لایا گیا مجھے
رکھے تھے اس نے سارے سوئچ اپنے ہاتھ میں
بے وقت ہی جلایا بجھایا گیا مجھے
چاروں طرف بچھی ہیں اندھیروں کی چادریں
شاید ابھی فضول جگایا گیا مجھے
نکلے ہوئے تھے ڈھونڈنے خونخوار جانور
کانٹوں کی جھاڑیوں میں چھپایا گیا مجھے
اک لمحہ مسکرانے کی قیمت نہ پوچھئے
بے اختیار پہلے رُلایا گیا مجھے
شاہد میر
No comments:
Post a Comment