ہوائے مرگ! مِرا اک دِیا سلامت رکھ
میں حبس زاد ہوں میری ہوا سلامت رکھ
میں آنسوؤں کے مصلّے پہ سر جھکائے رہوں
مِرے خدا! مِرا حرفِ دعا سلامت رکھ
میں اپنا چہرہ فراموش کر نہ جاؤں کہیں
اے شہرِ سنگ! مِرا آئینہ سلامت رکھ
مجھے سزائے محبت قبول ہے لیکن
بس ایک شرط کہ میری سزا سلامت رکھ
کسی کی سانس مِری سانس کا تسلسل ہے
بنامِ زیست یہ اک سلسلہ سلامت رکھ
دعا گزار ہیں زاہد کی آنکھ کے آنسو
گلاب ہونٹوں کا ہر قہقہہ سلامت رکھ
زاہد شمسی
No comments:
Post a Comment