بلند آہنگ اور پر شور ہو کے گزرے

 بلند آہنگ اور پُر شور ہو کے گزرے

شکست سے انحراف کا زور ہو کے گزرے

بس ایک لمسِ تپش سے بخشی لپک سروں کو

تمہارے نغمات سے بس اک پور ہو کے گزرے

کریہہ موسم،۔ کرخت آوازیں،۔ کالے منظر

خود اپنے جنگل سے ہم بہت بور ہو کے گزرے

وہ جس کی جانب سے سنگِ گلبست آ رہے ہیں

بچے نہیں اس سے، ہم اسی اور ہو کے گزرے

جو لہر اٹھی ہے آسماں چُھونے اس سے کہ دو

ہمارے قریہ سے  نرم، کمزور ہو کے گزرے

ہے کون ایسا جو اس کے جلووں کی تاب لائے

ہے کون جو اس گلی سے چِت چور ہو کے گزرے

بہت سے لمحات ضد تھے اشہر جی دوسروں کے

ہم ان کے ہی درمیان سے ڈور ہو کے گزرے

اشہر ہاشمی