میں تو کہتی ہوں کہ یہ کام ہی بیہودہ ہے

 میں تو کہتی ہوں کہ یہ کام ہی بیہودہ ہے

دامنِ عشق اگر حِرص سے آلودہ ہے

جو بھی آتا ہے یہاں وہ یہیں کھو جاتا ہے

میرا کوچہ بھی مِرے شہر میں برمودہ ہے

کوئی ماضی نہیں میرا، نہ کوئی مستقبل

میں وجودی ہوں مِرا وقت بھی موجودہ ہے

جو گیا زیرِ زمیں لوٹ کے آتا ہی نہیں

یعنی دوزخ کا مکیں قبر میں آسودہ ہے

لوگ خودکش جسے سمجھے ہیں بنامِ غیرت 

وہ تو مینار سے شہرت کے لیے کودا ہے

فلسفہ ربڑی، زباں شیرہ، سویّاں ہیں خیال

شاعری اپسرا کی ذہن کا فالودہ ہے

اپسرا گل