فضائے ذہن و بدن گل پگھلنے لگتی ہے

 عارفانہ کلام نعتیہ کلام

فضائے ذہن و بدن گل پگھلنے لگتی ہے

لبوں پہ نعتِ نبیﷺ جب مچلنے لگتی ہے

درودﷺ و نعت مِری آخری دوائیں ہیں

انہیں پڑھوں تو طبیعت سنبھلنے لگتی ہے

کرے جو بات کوئی نعتیہ تکلم میں

تِرے فقیر کی لُکنت غزلنے لگتی ہے

یہ کیا کبھی جو وضو کر کے آنکھ لگ جائے

نماز خواب کے سانچے میں ڈھلنے لگتی ہے

کبھی جو سوچوں مدینہ ہے مجھ سے دور بہت

مجھے یہ ظاہری دوری نگلنے لگتی ہے

درودِ پاکؐ کی محفل سجے جو گھر پہ مِرے

ثناء کی خوشبو بھی چھت پر ٹہلنے لگتی ہے

دکھائی دیتا ہے جوں سبز گنبدی روضہ

تِرے مریض کی حالت بدلنے لگتی ہے

عطا شرف جو کریں آپؐ اپنے شاعر کو

سخن سے نعت کی صورت نکلنے لگتی ہے

گل جہان