ہر ایک دُکھ نہ سپردِ قلم کِیا جائے
یہ عشق ہے اسے کم کم رقم کیا جائے
میں ایک بھٹکے ہوئے عشق کی لپیٹ میں ہوں
سو مجھ پہ سورۂ یوسف کا دَم کیا جائے
میں رقص کرتا ہوں جی بھر کے خاک اڑاتا ہوں
مجھے بھی دشت کی وحشت میں ضم کیا جائے
مِرے لہو سے کیا جائے راستہ روشن
مِرا پھٹا ہوا کُرتا عَلَم🏴 کیا جائے
سنائی جائے کوئی داستاں محبت کی
میں تھک چکا ہوں مجھے تازہ دم کیا جائے
فلک کو سونپ دئیے جائیں یہ فلک زادے
زمیں کے بوجھ کو تھوڑا سا کم کیا جائے
جہان عشق ہے ہر شے سے ماورا شہزاد
یہاں نہ ذکرِ وجود و عدم کیا جائے
قمر رضا شہزاد
No comments:
Post a Comment