سرور رہتا ہے کیف دوام رہتا ہے

 عارفانہ کلام نعتیہ کلام

سُروُر رہتا ہے کیفِ دوام رہتا ہے

لبوں پہ میرے درودﷺ و سلام رہتا ہے

بری ہیں نارِ جہنم سے خدا کی قسم

وہ جس کو ذکرِ محمدﷺ سے کام رہتا ہے

جو ایک بار انہیںﷺ دیکھ لے مقدر سے

تمام عمر انہیںﷺ کا غلام رہتا ہے

تمہارےﷺ در کی گدائی جسے میسر ہے

اسی کے قبضے میں سارا نظام رہتا ہے

نثار خاکِ مدینہ پہ یہ نجومِ فلک

طوافِ شاہ میں ماہِ تمام رہتا ہے

یہ ہے حیاتِ محبت کا ماحصل خالد

کہ دردِ نعتِ نبیؐ صبح و شام رہتا ہے

خالد محمود خالد

خالد محمود نقشبندی