دیکھ اے عرش پر لگی ہوئی آنکھ

 دیکھ اے عرش پر لگی ہوئی آنکھ

تھک گئی تیری سمت اُٹھی ہوئی آنکھ

اب مناظر بدلنے والے ہیں

اب اُدھڑنے لگی ہے سی ہوئی آنکھ

صرف چند ایک رنگ جانتی تھی

دستِ تہذیب کی چُھوئی ہوئی آنکھ

بھلے لحظہ سہی، مگر رُکی ہے

چلو اتنی تو وہ سخی ہوئی آنکھ

عمر گزری ہے اشک چنتے ہوئے

یوں نہیں کاسۂ نمی ہوئی آنکھ

خوف آتا ہے اصل منظر سے

میں نہ کھولوں گا بند کی ہوئی آنکھ

پھر نیا داؤ آزمایا گیا

پھر جلا دی گئی، بُجھی ہوئی آنکھ

دفعتاً اک گمان سچ ہوا، اور

ہر یقیں بُجھ گیا، تہی ہوئی آنکھ

زبیر ارشد