آئینِ تیرگی
ہے تقاضائے شبِ منتقم
کہ جو باقی ماندہ ہیں چند جگنو
فسادِ صبح کی علامتیں ہیں
خلافِ آئینِ تیرگی ہے
رہے جو امکان سحر باقی
سو نوچ لو
سب چمکتی آنکھیں
سنو
فجر کا کوئی مؤذن
دریدہ دہنی سے کام لے کر
جو خواب زادوں کو پھر جگائے
تو کاٹ ڈالو
زبان اس کی
یہ شاہی فرمان عام کر دو
کہ اب یہاں پر
جہانِ شب میں
فقط عقیدے کا راج ہو گا
عقیدہ یہ ہے
کہ آخرِ شب ملے گی جنت
جو سُرخ نہروں پہ مشتمل ہے
وہاں کھڑی ہیں
وہ شوخ و بے باک لاکھوں حُوریں
کہ جن کے ہونٹوں پہ خونِ انساں کی سُرخیاں ہیں
الطاف بخاری
No comments:
Post a Comment