جل اٹھے ہیں نگاہوں میں کتنے دیے اک ترے نام سے

 عارفانہ کلام حمد نعت منقبت

جل اٹھے ہیں نگاہوں میں کتنے دِیے اک تِرےﷺ نام سے

کھل اٹھے راستوں میں عجب پھول سے اک تِرےﷺ نام سے

کوئی خوشبو سی تھی لے اڑی جو ہمیں راستہ راستہ

دیکھتے دیکھتے طے ہوئے مرحلے اک تِرےﷺ نام سے

درد تھا مستقل، بے ٹھکانہ تھا دل اور ہم پا بہ گل

چین سا آ گیا خواب روشن ہوئے اک تِرےﷺ نام سے

جتنے جالے تنے تھے مِری روح پر سب دھواں ہو گئے

دور ہونے لگے سارے شکوے گلے اک تِرےﷺ نام سے

گنگنانے لگی ہے مِری روح بھی تیریﷺ یاد آ گئی

جگمگانے لگے، میرے سب آئینے اک تِرےﷺ نام سے

امجد اسلام امجد