عارفانہ کلام حمد نعت منقبت
ہر ایک صفت کا تیری ذات سے حصار کیا
خُدا نے تجھﷺ کو مشیعت کا شاہکار کیا
تِرےؐ کرم نے فقیروں کی جھولیاں بھر دیں
تِریؐ نظر نے گداؤں کو شہریار کیا
تِرےؐ وجود کا اعجاز ہے کہ انساں نے
صفات و ذاتِ الٰہی کا اعتبار کیا
تکی ہے راہ خلیلؑ و کلیمؑ و عیسٰیؑ نے
خدا نے عرش پہ خود تیراؐ انتظار کیا
بُرّاق آیا تو صف باندھ لی فرشتوں نے
رکاب چوم کہ جبرئیلؑ نے سوار کیا
اٹھی تجلئ کُبریٰ میں جب نمود کی موج
طہور میں تِریؐ صورت کو اختیار کیا
سجا کے ختمِ نبوت کا تیرےؐ سر پہ تاج
خُدا نے تجھ کو رسولوں کا تاجدار کیا
وہ کج کلاہوں کے چکر میں پڑ نہیں سکتا
طواف جس نے تِرےؐ در کا ایک بار کیا
تجھیؐ نے قصرِ امارات کو کر دیا مسمار
تجھیؐ نے خِلعتِ شاہی کو تار تار کیا
تِریؐ نگاہِ کرم نے اُسے تسلی دی
وہ آنکھ جس کو زمانے نے اشکبار کیا
تِرےؐ طفیل ہے محشر میں سربلند نصیر
تِراؐ کرم کہ اسے اُمتی شمار کیا
سید نصیرالدین نصیر
No comments:
Post a Comment