اک نام مصطفیٰ ہی فقط جان نعت ہے

 عارفانہ کلام حمد نعت منقبت

اک نامِ مصطفیٰﷺ ہی فقط جانِ نعت ہے

جواس کے ذیل میں ہے وہ شایانِ نعت ہے

کوئی کلام ہو کہاں شایانِ نعت ہے

قرآنِ پاک ہی ہے جو قرآنِ نعت ہے

الحمد کے الف سے حدِ حرفِ سین تک

کتنا وسیع دیکھیے میدانِ نعت ہے

پیشِ نظر حضورؐ کا اسوہ رہے تو پھر

ہر شعبۂ حیات میں امکانِ نعت ہے

ختم الرسلؐ کے ہاتھ کی انگشتری تو دیکھ

اس میں جڑا نگینۂ مرجانِ نعت ہے

مقدور ہو تو پوچھ لو روح الامینؑ سے

اس دور میں بھی کیا کوئی حسّانِ نعت ہے

فردِ عمل کا کوئی بھروسہ نہیں حضور

کرنے کو پیش بس یہی دیوانِ نعت ہے

اے مدح خوانِ شان رسالت بتا مجھے

پیش نظر تِرے کوئی میزانِ نعت ہے

کچھ آگہی تھی مجھ کو بھی حا میم دال سے

سو میں نے کہہ دیا مجھے عرفانِ نعت ہے

دفتر کئی لکھے ہیں مدیحِ رسولﷺ میں

شہزاد آج تک مجھے ارمانِ نعت ہے

شہزاد مجددی