باریابی کے لیے آقا ترستا میں بھی ہوں

 عارفانہ کلام حمد نعت منقبت

باریابی کے لیے آقاﷺ ترستا میں بھی ہوں

اک نگاہِ مہرباں کہ دل گرفتہ میں بھی ہوں

یہ مِرا وجدان کہتا ہے کہ شہرِ نُور میں

خاک کے ذروں میں شامل جستہ جستہ میں بھی ہوں 

آپﷺ کے دربار میں نادم، خجل با چشمِ نم

دست بستہ لفظ بھی ہیں دست بستہ میں بھی ہوں

دفن ہو جاؤں تِرے رستے میں اور پھر یہ کہوں

جو تِری بستی کو جاتا ہے وہ رستہ میں بھی ہوں

اک تصور ہی سہی جینے کو کافی ہے حضورﷺ

آپؐ کے لطف و کرم سے سانس لیتا میں بھی ہوں

ساعتِ خوش بخت لے جاتی ہے تیرے شہر میں

رات بھر زاہد! ان آنکھوں سے برستا میں بھی ہوں

زاہد شمسی