یاد نبی کا گلشن مہکا مہکا لگتا ہے

 عارفانہ کلام حمد نعت منقبت

یادِ نبیﷺ کا گلشن مہکا مہکا لگتا ہے

محفل میں موجود ہیں آقاﷺ ایسا لگتا ہے

نامِ محمدﷺ کتنا میٹھا میٹھا لگتا ہے

پیارے نبیؐ کا ذکر بھی ہم کو پیارا لگتا ہے

لب پر نغمے صلِّ علیٰ کے، ہاتھوں میں کشکول

دیکھو انﷺ کا منگتا کتنا اچھا لگتا ہے

آنکھوں میں مازاغ کا سُرمہ، سر طٰہٰ کا تاج

کیسے کہہ دوں رحمت والا ہم سا لگتا ہے

غوث قطب ابدال قلندر سب ان کے محتاج

میرا داتا ہر داتا کا، داتا لگتا ہے

اَوْ اَدْنیٰ کی بزم سجی ہے عرشِ بریں پر آج

حق کا دلارا باندھ کے سہرا دولہا لگتاہے

ان کے در پہ پلنے والے اپنا آپ جواب

کوئی فریدالدین تو کوئی خواجہ لگتا ہے

یادِ نبیﷺ میں رونے والا ہم دیوانوں کو

لاکھ پرایا ہو وہ پھر بھی اپنا لگتا ہے

آؤ سنائیں اپنے نبیؐ کو اپنے دل کی بات

ان کے علاوہ کون نیازی اپنا لگتا ہے

عبدالستار نیازی