مری نظر میں وہ حقدار بادہ ہے ہی نہیں

 مِری نظر میں وہ حق دارِ بادہ ہے ہی نہیں

کہ جس کے ظرف کا دامن کشادہ یے ہی نہیں

تکلفات سے پُر ہیں مزاج لوگوں کے

یہاں کسی کی بھی گُفتار سادہ ہے ہی نہیں

میں آئینے سے گُزرتا ہوں روز کترا کر

کہ خود سے ملنے کا میرا ارادہ ہے ہی نہیں

اگر مگر سے تِرے مجھ کو صاف لگتا ہے

تِرے لہو میں بغاوت کا مادہ ہے ہی نہیں

میں کہکشاں کا مسافر، تُو خاک کا راہی

جو میرا جادہ ہے وہ تیرا جادہ ہے ہی نہیں

سخن کے فیتے سے گُفتارِ شہر ماپ کے دیکھ

کسی کا قد مِرے قد سے زیادہ ہے ہی نہیں

ہم اُس کو پیر سمجھ کر دُعائیں لیتے ہیں

کہ جس کے تن پہ حیا کا لبادہ ہے ہی نہیں

میں سوچتا ہوں کہ تلوار ساتھ لے جاؤں

اگرچہ لڑنے کا میرا ارادہ ہے ہی نہیں

بنائے گا کسے اب شاہ تخت کا وارث

کہ سلطنت کا کوئی شاہزادہ ہے ہی نہیں

برہنہ اس لیے تہذیب ہو گئی مشتاق

کلامِ پاک سے کچھ استفادہ ہے ہی نہیں

حبیب الرحمٰن مشتاق

حبیب الرحمان مشتاق