چمن کے بقا کی مری آرزو ہے

 چمن کے بقا کی مِری آرزو ہے

جہالت غضب کی مِرے چار سُو ہے

خدا جانتا ہے مِرے واسطے خیر ہوگی

کہ ایمان میرا تو لا تقنطوا ہے

ترانہ وطن کی محبت کا گائے

وہ جو گُلستاں میں رہا با وُضو ہے

چمن کو شہیدوں نے سینچا لہو سے

انہی کے لہو سے چمن کی نمو ہے

خدایا! مِرا دیس اب جل رہا ہے

عطا کیجیے آپ جو صلح جُو ہے

یہ لہجہ تِرا زہر آلود ہے کیوں؟

تُو کیوں اس قدر ترش و تُند خُو ہے

کسی بد نظر نے لگائی نظر یوں

یہاں چار سُو ہو رہی ہاؤ ہُو ہے

وطن کی محبت سے معمور دل ہی

خدا کے کرم سے ہوا سرخرُو ہے

عباس علی شاہ ثاقب

تعارف

قارئین آج آپ کے ساتھ نوجوان شاعر عباس علی ثاقب صاحب کی غزل بانٹتے ہیں۔ ان کا مکمل نام عباس علی شاہ ثاقب ہے، آپ یکم جون 1992 پیدا ہوئے، بی- اے گورنمنٹ فریدیہ کالج پاک پٹن، پنجاب میں پیدا ہوئے۔ بعد ازاں ایم- اے اردو اور ایم- اے فزیکل ایجوکیشن کی تعلیم حاصل کی۔ آپ عملی زندگی میں درس و تدریس کے شعبے سے منسلک ہیں۔ رفاہ انٹرنیشنل یونیورسٹی فیصل آباد کیمپس سے "پاکستان میں اردو حمدیہ قصیدہ نگاری" کے موضوع ایم فل اردو کا مقالہ بھی تحریر کیا ہے۔ ہونہار بروا کے چکنے چکنے پات کے مصداق جب وہ سال چہارم میں تھے جب ان کی غزل "المسعود" میں شائع ہوئی تھی، اس کے علاوہ بھی آپ کا کلام اور تنقیدی مضامین ملک کے معروف رسائل و جرائد، "فن زاد، مفاہیم، نالۂ دل، نیرنگ خیال، نکھار، غنیمت، اظہار" میں شائع ہو چکے ہیں۔ عباس علی ثاقب 2022 میں ادبی تنظیم "اظہارِ نو" کے جنرل سیکرٹری بھی رہ چکےہیں۔ آپ شاعری میں نئے امکانات و رجحانات کے متلاشی ہیں اور فن شاعری میں آپ پروفیسر نوید عاجز اور محمد شریف ساجد سے مشورۂ سخن کرتے ہیں۔ 

مِری شاعری کا تُو عنوان ہو گا

تمہی سے یہ منسوب دِیوان ہو گا