حیرت ہے کہ اب وہ بھی ہیں قربان تمنا

 جان تمنا

حیرت ہے کہ اب وہ بھی ہیں قربانِ تمنا

قدرت نے بنایا تھا جنہیں جانِ تمنا

اظہارِ تمنا میں نہیں ہم کو تکلف

مشکل یہ ہے ملتا نہیں پُرسانِ تمنا

ہیں جتنے حسیں شہر میں یاں اتنے ہیں مدفن

سینہ ہے مِرا شہرِ خموشانِ تمنا

اس عائیلی قانون میں جب بیاہے گئے تم

جُز مرگِ عدُو کیا ہے اب امکانِ تمنا

جینا اسے دُشوار ہے، مرنا اسے مُشکل

جس دل میں ترازو ہوا پیکانِ تمنا

کیا عرض کریں عرضِ تمنا کا نتیجہ

اک ڈانٹ میں گُم ہو گئے اوسانِ تمنا

صحت ہے نہ صورت ہے نہ دولت ہے نہ شہرت

کس برتے پہ مسٹر کو ہے ارمانِ تمنا

مسٹر دہلوی