جب جب خیالِ یار کے بندِ قبا کُھلے
خُوشبو کے سات رنگ مِرے احساس میں گُھلے
ہر صبح، تیری چشم کُشائی کو دیکھنے
اترے تِری دہلیز پہ کرنوں کے قافلے
ممکن نہیں زباں سے بیان ہو فُغانِ دل
اے کاش میرے دل کو کسی شب زباں ملے
تُو جب سے گیا ہے مِری ہستی میں رواں ہیں
بے نام کسی درد کے خود کار سلسلے
ہر سو فضا میں بن گئے خُوشبو کے دائرے
شاید کہیں وہ گیسوئے امبر فشاں کُھلے
ساقی نے پہلے بوسہ دیا، میری جبیں پر
سینے لگا کے بولا؛ پھر کیسا ہے، دل جلے
سانول بہ فیضِ عشق ہم سے خاک بسر بھی
رِندوں کے پیر ہو گئے، ساقی کے لاڈلے
سانول حیدری
No comments:
Post a Comment