یوں گھل گئی ہے تری روح مرے وجداں میں

 درد آشنائی

یوں گُھل گئی ہے تِری رُوح مِرے وِجداں میں

جو راستے میں تِرے کانٹے درد کے آئیں

تو میرے پیروں میں ہر خار کی چُبھن اُترے

کبھی ستارے جو چمکیں تِرے سرِ مژگاں

تو میری آنکھوں میں ہر اشک کی جلن اُترے

ذرا سا غم بھی اگر تیرے پاس سے گُزرے

تو میرے سینے میں اس درد کی دُکھن اُترے

تجھے جو نیند نہ آئے بروگ راتوں میں

تو میرے تن پہ تیری رُوح کی تھکن اُترے

رہے جو تشنہ تمنا تِری تو جانِ صدف

مِری اُمنگوں پہ اندوہ کا کفن اُترے

جو داغدار کرے تیرے نُور کو اک پل

اے مِرے چاند! مِرے دل پہ وہ گہن اُترے

دُھواں اُداسی کا پھیلے تِرے تصور پر

تو میری نظموں میں اس سوچ کی گُھٹن اُترے

تُو آشنا رہے گُل ہائے تازہ و تر سے

قدم قدم پہ مہکتا ہوا چمن اُترے

مِری دُعا کے تقدس نے جو بُنا ہے ابھی

تِرے وجود پہ میرا وہ پیرہن اُترے

صدف مرزا