وقت دانائی فن مانگتا ہے

 وقت دانائیِ فن مانگتا ہے

اک نیا طرزِ سخن مانگتا ہے

مرہمِ زخمِ جگر دے کر وہ

مجھ سے گُلرنگِ چمن مانگتا ہے

صرف اک شب کی مسافت کے عِوض

کتنی صدیوں کی تھکن مانگتا ہے

دے کے آزاد اُڑانوں کا شعور

جسم پابندِ رسن مانگتا ہے

موت محبوبِ خلائق ہوئی کیا

شہر کا شہر کفن مانگتا ہے

صرف خُوشبو کا طلبگار ہے وہ

چاند، تارے، نہ پوَن مانگتا ہے

کتنے مشہور ہوئے ہیں جنگل

شہر کا شہر ہی بَن مانگتا ہے

گو کہ خُوشیوں کا ہے فُقدان بہت

دل مگر رنج و محن مانگتا ہے

بے سخن شہر میں مجھ کو ثروت

ہر کوئی دادِ سخن مانگتا ہے

ثروت ظفر