عارفانہ کلام حمد نعت منقبت
گُنبدِ سبز اگر دیدۂ تر میں آ جائے
نُور کا سَیل مِرے فکر و نظر میں آ جائے
دل کے آنگن میں نمویاب ہو اِک شاخِ درودؐ
زندگی اُجڑے ہوئے خاک کے گھر میں آ جائے
جس پہ لکھا ہو؛ مدینہ ہے یہاں سے نزدیک
سنگِ میل ایسا مِری راہ گُزر میں آ جائے
تیری توصیف رہے میرے لبوں پر ضَو ریز
اِک اُجالا سا مِرے شام و سحر میں آ جائے
آپﷺ کی سیرتِ اطہر ہو اگر روحِ عمل
وُسعتِ قلب و نظر، قلب و نظر میں آ جائے
تیرے دیدار کی خواہش رہے سرمایۂ زیست
تیری نسبت کا شرف زادِ سفر میں آ جائے
میں بھی بوصیریؒ کے قدموں سے لِپٹنے لگ جاؤں
نعت کا رنگ مِرے حرفِ ہُنر میں آ جائے
ارشد محمود ناشاد
No comments:
Post a Comment