داستاں در داستاں جلتا رہا
شہرِ جاں شہرِ اماں جلتا رہا
تیرگی میں روشنی ہوتی رہی
روشنی کا اک جہاں جلتا رہا
رات کی رانی کی خُوشبو بُجھ گئی
خُوشبوؤں کا کارواں جلتا رہا
خُوبئ قسمت بھری برسات میں
رفتہ رفتہ آشیاں جلتا رہا
جاں بھی تیرے درد سے ہلکان تھی
دل بھی سینے میں نہاں جلتا رہا
راس کب آئی ہمیں راہِ جنوں
کاروانِ بے کساں جلتا رہا
مسجدیں بارُود سے بھر دی گئیں
اور سجدے کا نشاں جلتا رہا
کھا گئی سچائی کو نفرت کی آگ
حرفِ حق شعلہ بجاں جلتا رہا
دل میں ثروت وہ جو اک احساس تھا
ماورائے جسم و جاں جلتا رہا
ثروت ظفر
No comments:
Post a Comment