لولاک زیر سایۂ فیضان نعت ہے

 عارفانہ کلام حمد نعت منقبت

لولاک زیرِ سایۂ فیضانِ نعت ہے

وجہِ قرار، نِسبتِ دامانِ نعت ہے

نازاں بہارِ خُلد ہے اپنے نصیب پر

فرحاں بفیضِ ثروتِ بارانِ نعت ہے

جو حرفِ کُن ہے باعثِ آغازِ کائنات

مستور اُس میں دعوت و اعلانِ نعت ہے

حُبِ نبیؐ سے جذبۂ طاعت کو ہو فروغ

حُبِ نبیﷺ ہی موجبِ میلانِ نعت ہے

موقوف ایک گو شۂ ہستی پہ کب ہے نعت

"ہر شعبۂ حیات میں امکانِ نعت ہے"

پکڑو نہ قدسیو! مِرے اعمال پر مجھے

دیکھو کہ میرے ہاتھ میں دیوانِ نعت ہے

بہرِ حصولِ ہدیۂ تحسیں، رواں دواں

طیبہ کی سمت ناقۂ وِجدانِ نعت ہے

پُوچھا جو میں نے کیا ہے فلک تو مِلا جواب

اے بے خبر! یہ گُنبدِ ایوانِ نعت ہے

ارشد! مِرے نبیﷺ کا یہ اعجاز دیکھنا

شام و سحر نئی سے نئی شانِ نعت ہے

ارشد محمود