عارفانہ کلام حمد نعت منقبت
عجب ہے کیف عجب ہے خُمار آنکھوں میں
بسا ہوا ہے نبیﷺ کا دیار آنکھوں میں
جو آئی یادِ مدینہ تو آنسوؤں کی طرح
چُھپا لیا ہے اسے بے قرار آنکھوں میں
مجھے تلاش نہیں سُرمہ بصیرت کی
ہے ان کی راہگُزر کا غُبار آنکھوں میں
کھڑے ہوئے ہیں تِرے در پہ تیرے دیوانے
وفا کی نذر لیے اشکبار آنکھوں میں
قسم خُدا کی مدینہ جنہوں نے دیکھا ہے
میں ڈھونڈ لوں گا وہ آنکھیں ہزار آنکھوں میں
تصوّرات میں طیبہ ہے رو برو شاعر
رچی ہوئی ہے مجسّم، بہار آنکھوں میں
شاعر لکھنوی
No comments:
Post a Comment