دل میں کھلا ہوا جو گلستان نعت ہے

 عارفانہ کلام حمد نعت منقبت

دل میں کِھلا ہوا جو گُلستانِ نعت ہے

لفظوں پہ دم بہ دم مِرے بارانِ نعت ہے

لب پہ درود، عشقِ نبیؐ دل میں موجزن

آ دیکھ میرے پاس بھی سامانِ نعت ہے

ہم سے بیاں نہ ہو سکے گی جانتے ہیں آپ

جا کے خُدا سے پوچھیے کیا شانِ نعت ہے

قسمت مِری سنور گئی، اُن کا کرم ہُوا

اُن کا کرم ہوا تُو یہ فیضانِ نعت ہے

تُو عشقِ مصطفیٰﷺ کو سخن کا امام کر

یہ عشقِ مصطفیٰؐ ہی تو پہچانِ نعت ہے

مجھ کو عطا ہو صدقۂ حسّانؓ یا رسولﷺ

سرکارؐ میرے دل کو بھی ارمانِ نعت ہے

ناہید شعر گوئی پہ موقوف تو نہیں

"ہر شعبۂ حیات میں امکانِ نعت ہے"

ناہید ورک