عالم میں ہر اک اس کا شیدا نظر آتا ہے

 عارفانہ کلام حمد نعت منقبت

عالم میں ہر اک اس کا شیدا نظر آتا ہے 

اس طُور کا ہر ذرّہ موسیٰ نظر آتا ہے 

بندہ کی معیّت میں مولا نظر آتا ہے 

قطرے کی حقیقت میں دریا نظر آتا ہے 

دریا کے تجسّس میں پیاسا ہی نہیں حیراں 

دریا بھی تو پیاسے کا شیدا نظر آتا ہے 

انوارِ نبیﷺ دیکھو اللہ کی آنکھوں سے 

بندوں کی نگاہوں میں بندہ نظر آتا ہے 

اے دَیر و حرم والو! دیکھو نظرِ حق سے 

دل کافر مومن کا کعبہ نظر آتا ہے 

گر غم سے لبوں پر دم آیا ہے مبارک ہو 

وہ دیکھ کوئی ہمدم آتا نظر آتا ہے 

کسی طرح نظر آئے وہ پردہ نشیں امجد

ہر پردہ کے بعد اور اک پردہ نظر آتا ہے 

امجد حیدرآبادی

سید احمد حسین