یزداں کا خاص فضل ہے میلان نعت ہے

 عارفانہ کلام حمد نعت منقبت

یزداں کا خاص فضل ہے میلانِ نعت ہے

"ہر شعبۂ حیات میں امکانِ نعت ہے"

احساس، لفظ، لہجہ و گُفتار عنبریں

کیونکر نہ ہوں گے دل جو گُلستانِ نعت ہے

انؐ کی ثناء کے نور سے روشن مِرا سخن

الحمد، بزمِ فکر، قلمدانِ نعت ہے

عشقِ نبیِ پاکؐ رگ و پے میں ہے مِرے

جاں میں بصورتِ لہو اک کانِ نعت ہے

کلیاں چٹک رہی ہیں بہ الفاظِ خُوش نما

صُبحِ گُمان سیرِ خیابانِ نعت ہے

پاکیزہ قلب، پاک تخیل، طہور لفظ

اسلوبِ خُوش بیان ہی شایانِ نعت ہے

اوجِ ادب ہے، وجد ہے، سرمستِ عجز ہوں

سرشارِ اطمینان ہوں، فیضانِ نعت ہے

کرتا ہے آبیارئ گُلزارِ مصطفیٰﷺ

مصعب تُو خوش نصیب ہے، دہقانِ نعت ہے

مصعب شاہین