دلوں سے غم مٹاتا ہے محمد نام ایسا ہے

 عارفانہ کلام حمد نعت منقبت

دلوں سے غم مٹاتا ہے محمدﷺ نام ایسا ہے

نگر اُجڑے بساتا ہے محمدﷺ نام ایسا ہے

انہی کے نام سے پائی فقیروں نے شہنشاہی

خُدا سے بھی ملاتا ہے محمدﷺ نام ایسا ہے

انہی کے ذکر سے روشن راتیں پھر لوٹ آتی ہیں

نصیبوں کو جگاتا ہے محمدﷺ نام ایسا ہے

درودوں کی مہک سے محفلیں آباد رہتی ہیں

میری نعتیں سجاتا ہے محمدﷺ نام ایسا ہے

محبت کے کنول کھلتے ہیں ان کو یاد کرنے سے

بڑی خُوشبوئیں لاتا ہے محمدﷺ نام ایسا ہے

مدد حاصل ہے مجھ کو ہر گھڑی شاہِ مدینہ کی

میری بگڑی بناتا ہے محمدﷺ نام ایسا ہے

میں فخری فکر دُنیا وآخرت سب بُھول جاتا ہوں

مجھے جب یاد آتا ہے محمدﷺ نام ایسا ہے

زاہد فخری