کچھ کمی تو جہد آزادی میں ایسی رہ گئی

 کچھ کمی تو جہدِ آزادی میں ایسی رہ گئی

جو مِرے پاؤں میں یہ زنجیر اُلجھی رہ گئی

میرے اس کے درمیاں کھینچی گئی خونی لکیر

میں تڑپتا رہ گیا، اور وہ سسکتی رہ گئی

باڑ کے نزدیک مت جاؤ وہاں بارود ہے

ایک ممتا اپنے شہزادے سے کہتی رہ گئی

کوئی گولی آ لگی پھر سینۂ معصوم میں

ہاتھ میں لقمہ رہا اور آدھی روٹی رہ گئی

فرش پر بکھرے قلم، بستے، دوات اور پُھول ہیں

ہاں مگر ہاتھوں میں مضبوطی سے تختی رہ گئی

اے خدا! ان ماؤں اور بہنوں کے نوحے سُن ذرا

جن کے بس میں صرف بین اور آہ و زاری رہ گئی

سید جواد حاشر