سوا اس کے نہ کوئی لفظ نا کوئی صدا نکلے

 عارفانہ کلام حمد نعت منقبت

سوا اس کے نہ کوئی لفظ نا کوئی صدا نِکلے

زبان و دل سے بس صلے علٰی صلے علٰی نکلے

حیاتِ طائرِ خوش بخت ہر دم بوسہ گیری کو

عقیدت سے مزیّن ڈُھونڈنے نعلینِ پا نکلے

بتاؤں کیا فضیلت ارضِ طیبہ کی تمہیں اس سے

شفا نکلے، دوا نکلے، خزانے بے بہا نکلے

خدایا نخلِ ہستی ہو ثناؤں سے ثمر آور

ہر اک برگِ ثنا پر پھولِ مدحت خوش نما نکلے

مِرے مولا درودِ پاک پڑھ کر پیارے آقاﷺ پر

لبوں سے کلمۂ طیب مِرے وقتِ قضا نکلے

رسولِ پاکﷺ کی سیرت پہ رہنا تم عمل پیرا

اگر چاہے ہے محشر میں نتیجہ دل کشا نکلے

وجودِ ناقصاں کا کل اثاثہ نکہتِ سرورﷺ

مِری اس دل کی گٹھڑی سے ثنائے مصطَفیٰﷺ نکلے

رکاوٹ عشقِ احمدﷺ میں بنی ہے دہر کی الفت

دعا کرنا مِرے دل سے یہ اُلفت دوستا نکلے

بروزِ حشر اے مولا ثنائے پاک کے صدقے

بقیعِ پاک سے احقر کا جسمِ خوش رسا نکلے

یہی تُو مانگ اس در پر دعا زاہِد ہر اک لمحہ

مِری نسلوں میں ہر بچہ تِراﷺ مِدحت سرا نکلے

سرفراز زاہد