اک بار پھر فقیر پہ احسان نعت ہے

 عارفانہ کلام حمد نعت منقبت

اک بار پھر فقیر پہ احسانِ نعت ہے

پھر بے ہنر کے ہاتھ قلمدانِ نعت ہے

حاصل جو شرف بوسہِ دامانِ نعت ہے

میرا کہاں کمال، یہ فیضانِ نعت ہے

فن کا کمال ہے نہ تخیل پہ منحصر

ہو جائے جو عطا وہی سامانِ نعت ہے

دوڑا یہاں نہ عقل کے گھوڑے سخنورا

دے فکر کو لگام کہ میدانِ نعت ہے

آقاؐ کے حکم پر جو پڑھا ان کے سامنے

حسان کا کلام وہ سلطانِ نعت ہے

بازار، گھر، دُکان ہو دفتر کہ مدرسہ

"ہر شعبۂ حیات میں امکانِ نعت ہے"

گلہائے رنگا رنگ معطر ہیں چار سُو

ہر ایک بزمِ نعت، گلستانِ نعت ہے

بوندیں کرم کی ڈال دے نیر فقیر پر

یہ کم سخن بھی طالبِ بارانِ نعت ہے

ابرار حسین نیر