ہزار نیزوں پہ اچھلے مگر نہیں ہوتا
حسینؑ جیسا زمانے میں سر نہیں ہوتا
جہاں ہر ایک کو ہو اعتبار کی خواہش
وہاں پہ کوئی کبھی معتبر نہیں ہوتا
مِری انا مجھے آوارگی پہ اکساتی
جو میرے ساتھ مِرا ہمسفر نہیں ہوتا
کہیں بُتوں کی نمائش میں میں بھی بک جاتا
جو میرے سر کے لیے تیرا در نہیں ہوتا
میں اپنے آپ سے تو بے خبر رہا ہوں سدا
مگر میں تجھ سے کبھی بے خبر نہیں ہوتا
میاں سعید! یہی جنگلوں کا ہے آئین
جو سُوکھ جاتا ہے پھر وہ شجر نہیں ہوتا
سعید نعمانی مرادآبادی
No comments:
Post a Comment