نہ پوچھ مجھ سے تو کیسے کہاں سے لڑنا ہے

 نہ پوچھ مجھ سے تو کیسے کہاں سے لڑنا ہے

زمیں پہ رہ کے مجھے آسماں سے لڑنا ہے

ہماری ضد ہے کہ ہم کو فلاں سے لڑنا ہے

سمجھ میں آتا نہیں ہے کہاں سے لڑنا ہے

یہ شہریار ہی میرے چمن کا دشمن ہے

اسی لیے تو غم بوستاں سے لڑنا ہے

ہر ایک رات اسی فکر میں گزرتی ہے

کہ صبح ہوتے ہی پھر جسم و جاں سے لڑنا ہے

زباں کو تیغ و تبر کس لیے بناؤ گے

اے بد زباں تمہیں اک بے زباں سے لڑنا ہے

یہ کہہ رہی ہیں ہوائیں کہ رت بھی بدلے گی

چمن میں سارے گلوں کو خزاں سے لڑنا ہے

مرے جنون کو ارمان دنیا کچھ بھی کہے

جواب واعظ چابک زباں سے لڑنا ہے

ارمان جودھپوری