نُور مزدور
رُدالیو
شہرِ تِیرہ کے باسیو
ترک کر دو یہ اشکباری کی عادت
جان لو
شہرِ تاریک میں ممنوع ہے روشنی
کہ یہی رسم روا ہے
جس کی سوچوں سے نور پھیلے گا
تو سیاہ کار تعاقب میں رہیں گے اُسے بجھانے کو
نور کی ناتوان لَو سے بھی اندھیارے کی روح کانپتی ہے
اشک ایندھن ہے سیاہی کے لیے
کرب سچا ہے تو جلتے کیوں نہیں
آگ بن کر اس سیاہی کے کچلنے کو نکلتے کیوں نہیں
ایک قندیل کے بجھنے پہ رونے دھونے سے کچھ نہیں ہو گا
اور پھر اک نئے چراغ کے مرنے تلک یونہی سونے سے کچھ نہیں ہو گا
رُدالیو
نُور مزدور بنو
موت کی آنکھوں میں دیکھو لگاؤ قہقہہ
اُٹھو سورج اُگاؤ روشنی پہ کام کرو
شہرِ تاریک میں ہنسنے کا اہتمام کرو
عمران ثاقب
No comments:
Post a Comment