نہ کعبہ راہ میں اس کی نہ یہ بت خانہ آتا ہے

 نہ کعبہ راہ میں اس کی نہ یہ بت خانہ آتا ہے

جب آتا ہے کسی پر دل تو بے تابانہ آتا ہے

نہ جامِ مئے نہ تنہا ساقئ مے خانہ آتا ہے

مِری نظروں میں جب آتا ہے کُل میخانہ آتا ہے

پگھل جاتا ہے سینے میں دل شمع فروزاں بھی

قدم بوسی کو جس دم سر بکف پروانہ آتا ہے

بنا دے گا تجھے اکسیر اپنی سعئ پیہم سے

مبارک خاکِ صحرا! ہوش میں دیوانہ آتا ہے

قدم شاہانِ عالم اس کے بڑھ کے چُوم لیتے ہیں

فقیری میں بھی جو لے کر دلِ شاہانہ آتا ہے

اسی پر تو اٹھا کرتی ہے چشمِ فیض ساقی کی

جو لے کر مے کدے میں جرأت رندانہ آتا ہے

رہا کرتا ہے امجد یوں تو اکثر گوشۂ دل میں

مگر میداں میں جب آتا ہے بے باکانہ آتا ہے

امجد غزنوی