دل کا سکوں بدل گیا حالت اضطرار سے

 انتظار

دل کا سکوں بدل گیا حالتِ اضطرار سے

پرسشِ غم کرے تو کون، آ کے نحیف و زار سے

جان بہ تنگ آ گئی، اس دلِ بے قرار سے

اٹھنے لگے ہیں شعلے پھر دیدۂ اشکبار سے

دل کا سکوں بدل گیا حالتِ اضطرار سے

آنکھوں میں آ چلی ہے جاں شدتِ انتظار سے

اب تو بہار آ گئی، اب تو خزاں بھی جا چکی

ہو گیا سالِ نو شروع، تازہ بہار آ چکی

میرے نصیب کی بدی خوب مجھے ستا چکی

ہجر کا غم رلا چکا، غم کی جفا مٹا چکی

دل کا سکوں بدل گیا حالتِ اضطرار سے

آنکھوں میں آ چلی ہے جاں شدتِ انتظار سے

کنیز فاطمہ خاتون حیا لکھنوی