کانٹوں کی چبھن مانگنے والے نہیں جاتے

 کانٹوں کی چبھن مانگنے والے نہیں جاتے

مدت سے مِرے پاؤں کے چھالے نہیں جاتے

اک سمت سے روکوں تو اُٹھیں دوسری جانب

طُوفان، سمندر سے نکالے نہیں جاتے

آنکھوں میں مِرے دل کی اُتر آتے ہیں اکثر

وہ خواب جو فطرت سے سنبھالے نہیں جاتے

ذہنوں کو یہ بُجھ کر بھی کیا کرتے ہیں روشن

دن میں بھی چراغوں کے اُجالے نہیں جاتے

یہ کہہ کے مِرے دل کے سبھی اُڑ گئے پنچھی

پر باندھ کے ہم باغ میں پالے نہیں جاتے

مانا کہ اندھیرے میں ہیں اسرار فضائیں

خوابوں کے مگر بند اُجالے نہیں جاتے

اسرار اکبرآبادی

سید اسرار حسین