سفینہ ڈگمگانے لگ گیا ہے
کوئی رستہ دکھانے لگ گیا ہے
مراسم ختم ہوتا ہی سمجھیے
وہ کچھ نزدیک آنے لگ گیا ہے
تیرے غم نے بڑی چارہ گری کی
ہمارا غم ٹھکانے لگ گیا ہے
لہر دہلیز پر آئی ہے جب سے
سمندر خوف کھانے لگ گیا ہے
بہت دن ہو گئے بچھڑے ہوئے اب
مجھے وہ یاد آنے لگ گیا ہے
سفر تاریکیوں کا کر رہی ہوں
اجالا بوکھلانے لگ گیا ہے
یہ کوئی معجزہ ہے ہجر کا ہی
تو مجھ میں بڑبڑانے لگ گیا ہے
پونم یادو
No comments:
Post a Comment