تھرٹی فرسٹ
گزشتہ رات
یعنی
آخری شب ماہِ آخر کی
ہوئی رخصت
لیے آنکھوں میں آنسو شرمساری کے
کہ اُس اک آخری شب میں
نئے مہینوں کی آمد پہ
نہ جانے کتنے مے خانے
لگائے قہقہے شب بھر
نجانے کتنے گُلدستے
انھیں بہلائے یہ کہہ کر
کہ سالِ نو کی آمد ہے
اور یہ آخری شب ہے
تو اس اک آخری پَل میں
ذرا تو الفتیں بانٹو
جنہیں تم ساتھ لائے ہو
مزے سے عصمتیں لوٹو
کہ سرکاؤ نقاب اُن کے
ہاں بھڑکاؤ شباب اُن کے
پرانے سال کی رخصت
اور نو سال کی آمد کے تحفے میں
بدن بانٹو
بدن چاٹو
بدن کے تیز سگریٹ میں
ہوس کی آگ بھڑکاؤ
نہ گھبراؤ، نہ شرماؤ
سرود و رقص کی محفل
سجی ہے اک زمانے بعد
سجے گی اک زمانے بعد
تو ایسے میں بدن کی سرحدوں کو پار کر جاؤ
اور لوگو
اسی نو سال کے پہلے ہی دن
افسوس کی خبریں
بدستِ نامہ بر پہنچیں
کہ جشنِ سالِ نو کی شب
نہ جانے کتنی دوشیزہ
پھٹے کپڑوں میں گھر پہنچیں
کوثر تسنیم سپولی
No comments:
Post a Comment