یہ خیمہ موت کا خیمہ کے نام سے جانا جاتا ہے

 موت کا خیمہ

سرِ عام

بے قبلہ خیمے میں

بال کھول کر

تم  ناچنا شروع کرتیں

تو آنکھ نہ ملاتیں

ممنوع تھا تمہارا 

نامحرم کو دیکھنا

انہیں چھو کے گزرنا

تمہارے مرد نے منع کیا تھا

تم ناچتی جاتیں تو

تمہاری پائل کی آواز تیز ہوتی جاتی

اتنی کہ پوری بستی کے قبرستانوں میں گونجنے لگتی

اور ہر لاش اپنے کان پہ ہاتھ رکھ لیتی

یوں چھن چھن کی آواز 

ان کے اندر سرائیت کرنے لگتی

اور وہ اس میں مدہوش ہو جاتے

اپنے کان کھول دیتے

ان کے قلب کو آزاد پا کر

ان کے شکنجے سے دل چوری ہو جاتے

اور پھر اسی بازار کے خیمے میں فروخت ہوتے

جہاں تم ناچتی ہو

جہاں پیسوں کا نام لینا منع تھا

یہ خیمہ "موت کا خیمہ" کے نام سے جانا جاتا ہے

جس میں زندگی ملنے والے کی موت ہو جاتی

پھر اس کے اعضاء کی بولی لگتی

پھیپڑے کی ہر ہڈی کے دام الگ لگتے

جہاں سب ننگے پاؤں آتے

اور جو بے لباس ہوتا

اسے زیادہ  معاوضہ ملتا

جہاں سلگتے جسموں کو

پھولوں سے سنوارا نہیں جاتا

کیونکہ ان پہ مستعمل ہونے کا نشان موجود ہوتا ہے

جہاں ہیرے کے دام کم  

اور دل کے زیادہ ہوتے

کہ اس کا وزن زیادہ ہوتا ہے

بے رنگ نہیں ہوتا

تم نہیں جانتی 

کہ میں جانتی ہوں

تمہیں تمہارے مرد

اور اس کے دھندے کو

میں اس سے کبھی ملی نہیں

مجھے نہیں پتہ وہ کیسا دکھتا ہے

پر میں جانتی ہوں 

کہ اس کی سانولی رنگت 

پھیکی مسکراہٹ

ترچھی ناک

مینڈک سی موٹی آنکھیں

بکھرے بال ہیں

جو کبھی سنوارے نہیں گئے

اس کے چہرے کو مزید بدصورت بناتے ہیں

جیسے مصور نے کم پیسوں میں ایک بڑا آرڈر تیار کیا ہو

میں جانتی ہوں

وہ یہ جاننا چاہتا ہے کہ

سانس لے کر

اسے چھوڑنا کیوں ضروری ہے

اسے لفظ ادا کرنا تکلیف دیتے ہیں

اسے ملنا پسند نہیں

اس کے ہونٹوں پہ خشکی کی سطح جمی رہتی ہے

اس کی آواز میں وحشت ہے

اور تم اسے سن کے

ہمیشہ سہم جاتی ہو

ہمارے بائیں ہاتھ میں ایک لکیر اضافی ہے

جو اسے دائیں ہاتھ سے جوڑتی ہے

یوں کہو کہ یہ ہمیں ورثے میں ملی ہے

کرن رباب