شکوہ گلہ مطالبہ فریاد کچھ تو ہو

شکوہ، گِلہ، مُطالبہ، فریاد کچھ تو ہو

جینا اگر ہے اے دل برباد کچھ تو ہو

شیریں و دلنواز کوئی خواب ہی سہی

آخر تسلیٔ دلِ ناشاد کچھ تو ہو

خوش آ سکی نہ لذتِ تحسین ناشناس

تعریف بھی اگر ہو تو بُنیاد کچھ تو ہو

ہاں مُسکراؤ کُھل کے سرِ دار دوستو

دلکش تمہارے قتل کی رُوداد کچھ تو ہو

آؤ ناں گائیں نغمۂ آزادیٔ چمن

کُنجِ قفس میں خاطرِ صیاد کچھ تو ہو

حسرت سے تک رہی ہے مِری اِلتجا حضور

کب تک خموش رہیے گا ارشاد کچھ تو ہو

احباب کے دلوں پہ کوئی نقش چھوڑ جا

اے راز! تیرے ذِکر کی بنیاد کچھ تو ہو

غلام حسین راز بالاپوری