مستانہ پئے جا یونہی مستانہ پئے جا

مستانہ پیے جا، یونہی مستانہ پیے جا
پیمانہ تو کیا چیز ہے، مۓ خانہ پیے جا
کر غرق مۓ و جام، غمِ گردشِ ایام
ہاں اے دلِ ناکام! حکیمانہ پیے جا
مے نوشی کے آداب سے آگاہ نہیں تُو
جس طرح کہے ساقئ مۓ خانہ پیے جا
کشکول ہو یا ساغرِ جَم، نشہ ہے یکساں
شاہانہ پیے جا کہ فقیرانہ پیے جا
اس مَکر کی بستی میں ہے مستی ہی سے ہستی
دیوانہ بن اور با دلِ دیوانہ پیے جا
ہر جام میں رقصاں ہے پری خانۂ مستی
آنکھوں سے لگا کر یہ پری خانہ پیے جا
میخانے کے ہنگامے ہیں کچھ  دیر کے مہماں
ہے صبح قریب اخترِؔ دیوانہ پیے جا

اختر شیرانی