عمر کی شام ہوئی اور میں پیاسا مولا

عمر کی شام ہوئی اور میں پیاسا مولا
اب تو دریا، کوئی جھرنا، کوئی برکھا مولا
رُت کوئی صورتِ مرہم بھی میسر آتی
داغ رہ جاتا مگر زخم تو بھرتا مولا
بے مداوا جو رہا کل بھی بھری دنیا میں
اب بھی رِِستا ہے وہی زخمِ تمنا مولا
دائم آباد رہیں شہر تِرے، گاؤں تِرے
میرے کندھوں پہ دھرا ہے مِرا خیمہ مولا
ریتلے دشت بھی ہیں تیری ہی خلقت سائیں
سبز موسم کا اِدھر بھی کوئی پھیرا مولا
سَیل کی طرح امڈتی ہوئی اس خلقت میں
کوئی مُونس، کوئی ہمدم، کوئی اپنا مولا
ظلمتِ شب میں سدا خواب ہی دیکھوں جس کے
مجھ سے ملتا ہی نہیں ہے وہ سویرا مولا
تُو کہ سنتا ہی نہیں کوئی دُھائی میری
میں! کہ اب بھی ہے لبوں پہ میرے مولا مولا
دیکھ سکتا وہ جسے کھول کے آنکھیں رزمیؔ
ایک سورج تو ابھرتا کوئی ایسا مولا

خادم رزمی