محبت میں تیری ہے جینا ہی پینا

محبت میں تیری ہے جینا ہی پِینا
نہ کچھ فکرِ ساغر نہ کچھ ذکرِ مِینا
خزاں ہو گئی ہے بہارِ تمنا
عجب گل کھلائے بہار آفرینا
نگاہیں زمانے کی اس پر جمی ہیں
کِسے دیکھ بیٹھی میری چشمِ بِینا
کسی سے ہیں وابستہ میری امیدیں
یہی میرا مرنا، یہی میرا جینا
نگاہِ کرم تُو نے یہ بھی نہ چاہا
غمِ جاودانِ محبت بھی چھینا
خدا سے کریں شکوۂ ناخدا کیا
غنیمت ہے یہ بھی کہ ڈوبا سفینہ
نظر یوں بھی کرتا ہے کوئی محبت
نہ کوئی سلیقہ، نہ کوئی قرینہ

قیوم نظر